Zwilling-ის პრემიუმ ხარისხის დანები

რატომ უნდა ავირჩიოთ ეს მაღალფასიანი დანები?

თუ ერთხელ მაინც დამდგარხართ სამზარეულოს დანების არჩევის საჭიროების წინაშე, შეამჩნევდით, რომ საშუალო და მაღალი სეგმენტის საყოფაცხოვრებო მაღაზიები სამზარეულოს დანების მრავალფეროვან არჩევანს გვთავაზობს. დანები ერთმანეთისგან განსხვავდება ბრენდით, მასალით, დიზაინით და ფასით. თუ ცვილინგის სამზარეულოს დანებისთვის მოგიკრავთ თვალი, ალბათ გაგიჩნდებოდათ კითხვა: რატომ არის ცვილინგის დანები ძვირი? შეკითხვაზე პასუხი კი ან არასაკმარისად არგუმენტირებული მოგჩვენებიათ ან შესაძლოა, საერთოდ უპასუხოდ დარჩენილა. სწორედ ამიტომ, ვეცდებით თავი მოვუყაროთ იმ ძირითად მახასიათებლებს, რომლებიც Zwilling-ის დანებს ძვირადღირებულ შენაძენად აქცევს.

რა გამოარჩევს Zwilling-ის დანებს?

ისტორია – ცვილინგის ისტორია 1731 წელს, პრემიუმ ხარისხის სამზარეულოს დანების წარმოებით იწყება გერმანიაში, დანების მწარმოებელ ქალაქ ზოლინგენში. ბრენდმა დაისახა მიზნად შეექმნა ისეთი ხარისხის სამზარეულოს დანები, რომლებსაც ადამიანები მთელი ცხოვრების განმავლობაში ინტენსიურად გამოიყენებდნენ. ხარისხი 300-წლიან ტრადიციად იქცა და მასალის, წარმოების პროცესისა და ტექნოლოგიების ერთობლიობით იქნა მიღწეული.

მასალა – Zwilling-ის დანები მზადდება განსაკუთრებული ფორმულით შექმნილი გერმანული ფოლადისგან (X50CrMoV15). ფორმულა გულისხმობს ქრომისა და ნახშირბადის შთამბეჭდავად დაბალანსებულ კომბინაციას, მოლიბდენისა და ვანადიუმის შენადნობთან ერთად. თითოეული ელემენტი თავის უნიკალურ როლს ასრულებს ფოლადის სიმტკიცეში, ლაქებისა და კოროზიისადმი მდგრადობაში.

წარმოების მეთოდოლოგია – ცვილინგმა შეიმუშავა დანის პირის წარმოების უნიკალური მეთოდი და უწოდა მას SIGMAFORGE®-ი, რაც გულისხმობს ნაჭედი/გამოჭედილი (Forged) ტიპის დანის მიღებას. პროცესი იწყება ერთი ფილა ფოლადისგან, რომელიც გადის ინტენსიური დამუშავების პროცესს ტემპერატურისა და ძალის გამოყენებით. ამით ფოლადის სტრუქტურა შენარჩუნებულია სრულიად, სიმხურვალისგან დაუზიანებლად, რაც აუცილებელი წინაპირობაა განსაკუთრებით მყარი, მოქნილი, კოროზიისადმი მდგრადი დანებისთვის.

ამ მეთოდით დამზადებულ დანებში ცვილინგი იყენებს ე.წ ხიდს (Bolster). იგი ლითონის სქელი ნაწილია, რომელიც დანის პირსა და სახელურს უნაკეროდ აკავშირებს ერთმანეთთან და ორ უმთავრეს ფუნქციას ასრულებს: ამაგრებს დანას და იცავს თითს დაზიანებისგან.

გარდა გამოჭედვის ტექნოლოგიისა, ცვილინგი იყენებს ე.წ ამოტვიფვრის მეთოდსაც (Stamped – ტვიფრული, ამოტვიფრული). განსხვავებით ნაჭედი დანისგან, ტვიფრული დანის შექმნის პროცესი იწყება ლითონის ერთი დიდი ფირფიტით, რომლიდანაც ამოიჭრება წინასწარ გამზადებული ფორმის დანის პირი. ეს საკონდიტრო საქმიანობას ჰგავს – წარმოიდგინეთ, რომ გაქვთ საჭრელი ფორმები, რომელსაც დაადებთ გაბრტყელებული ცომის ფირფიტას და ამოჭრით სასურველ ფორმას.

ფოლადის გამოწრთობის პროცესი – Zwilling-მა შეიმუშავა ფოლადის გამოწრთობის/გამობრძმედის პროცესი და უწოდა მას უწოდა FRIODUR®-ი. იგი გულისხმობს ფოლადის თერმულად დამუშავებასა და გამაგრებას შემდეგი ეტაპებით:

1. ფოლადი ხურდება და მისი ტემპერატურა აღემატება 1000 °C-ს

2. შემდეგ ის ძალიან სწრაფად ცივდება, ჩამოსცდება 800 °C-ს. ამის შემდეგ კი გაციების პროცესი იწყებს შენელებას და მიდის ოთახის ტემპერატურამდე

3. პროცესი იწვევს ფოლადის ტრანსფორმაციას, უმჯობესდება მისი სიმტკიცე, ცვეთისა და კოროზიისადმი მდგრადობა. უმჯობესდება ფოლადის სტრუქტურაც.

4. წრთობას ჰარმონიაში მოჰყავს ფოლადის მიკროსტრუქტურა და ათავისუფლებს წნევისგან. პროცესის შედეგად ვიღებთ ფოლადის მაღალი დონის სიმყარეს, მოქნილობასა და კოროზიისადმი უკიდურეს მდგრადობას.

დანის პირის სიმკვეთრე – Zwilling-ის დანების თითოეული მხარე გალესილია 15 გრადუსიანი კუთხით. გარდა იაპონური დანების კოლექციისა, სადაც კიდევ უფრო ბასრია დანა და აქვს 9-12 გრადუსიანი კუთხე.

დანის პირი 15-გრადუსიანი კუთხით იდეალურია უნივერსალური ჭრისთვის, შეუძლია გაუმკლავდეს ისეთ მყარი ინგრედიენტებსაც კი, როგორიცაა ძვლები. უფრო ბასრი იაპონური დანის პირები კი უფრო რთული სამუშაოებისთვისაა იდეალური: სუშისთვის, ბოსტნეულისთვის…

ბალანსი – ერთ-ერთი პირველი, რასაც შეამჩნევთ Zwilling-ის დანის აღებისას, არის იდეალურად დაბალანსებული წონა – დანის მთლიანი წონა თანაბრად არის გადანაწილებული დანის სახელურსა და დანის პირს შორის.

ბალანსი მიღწეულია სპეციალურად შემუშავებული დიზაინით: სახელურის ნაწილში ჩასმულია სრული ფოლადი და მოთავსებულია ხის, პლასტმასის ან სხვა მასალის ორ ნაჭერს შორის.

მოათავსეთ დანა ხელის გულზე, ან ორ გაშლილ თითზე და ნახავთ რომ, დანა არ დაკარგავს წონასწორობას და არ ჩამოვარდება – ზუსტად ეს არის ბალანსი!

სახელურის მასალა – ბრენდი გულდასმით ეკიდება სახელურების შერჩევის საკითხს. იყენებს მხოლოდ უმაღლესი ხარისხის მასალებს, უხამებს დანის დანიშნულებას და აძლევს ერგონომიულ ფორმას. ბრენდის პროდუქციაში ნახავთ პლასტმასის, ხის, ე.წ მიკარტის და მეტალის სახელურიანი დანების კოლექციებს.

პლასტმასის სახელური (ABS, პოლიპროპილენი ან პოლიოქსიმეთილენი) ხასიათდება დარტყმის, ნაკაწრებისა და ტემპერატურის ცვლილებების მიმართ საოცარი მდგრადობით.

ხის სახელურების დამზადებისას იყენებს მხოლოდ პრემიუმ ხარისხის ხეს, რომელიც იდეალურად ერგება ხელის ფორმას და უზრუნველყოფს დანის კომფორტულ გამოყენებას ხელის გადაღლის გარეშე.

ე.წ მიკარტას სახელურები აერთიანებს ხის და პლასტმასის სახელურების უპირატესობებს. გამოირჩევა ხისებრი გარეგნობით და პლასტმასისთვის დამახასიათებელი გამძლეობით.

მეტალის სახელურების დამზადებისას ბრენდი იყენებს პრემიუმ ხარისხის უჟანგავ ფოლადს, რომელიც გამოირჩევა ქრომის და ნახშირბადის განსაკუთრებული კომბინაციით.

ამრიგად, სამსაუკუნოვანი გამოცდილება, გულდასმით შერჩეული მასალები, წარმოების უნიკალური მეთოდოლოგია, მრავალფეროვანი დიზაინი, დეტალებზე ორიენტირება და ინოვაციურობა ქმნის პრემიუმ კლასის ხარისხს და უზრუნველყოფს გრძელვადიან გამძლეობას, რაც პირდაპირპროპორციულია Zwilling-ის სამზარეულოს დანების საბაზრო ღირებულებასთან; ამიტომ, არჩევანიც გაკეთებულია 🙂

ბლოგის ავტორი:

ბორენა ყულიაშვილი